ராமதாஸின் மதிப்பு பெரிதும் உயர்ந்தது.

தாவுவதில் வல்லவரான ராமதாஸ் மீது தி.மு.க காரர்களுக்கு எப்போதும் ஒரு சந்தேகம், கோபம் இருக்கும். ஆனால் இப்போது அவர்களே ராமதாஸ் எவ்வளவோ மேல் என்று நினைக்கும் வண்ணம் அவர்களிடம் கெட்ட பெயர் மற்றும் கோபம் சம்பாதித்து விட்டார் வைகோ.

ஜெயலலிதாவோடு அவர் நிற்பதை பார்க்கும் போது, மிக கஷ்டபட்டு முகத்தில் உணர்வுகளை மறைத்து கொண்டு சிரிப்பதை பார்க்கும் போது நமக்கே தர்ம சங்கடமாக உள்ளது. மேடைக்கு மேடை சுயமரியாதை பற்றி முழங்கும் வைகோ, சுதந்திர உணர்வினை பற்றி குரல் கொடுக்கும் வைகோ, உயரம் தாழ்ந்து தரம் குறைந்து நிற்கிறார். மிகுந்த மெல்லிய குரலில் அரசியல் கூட்டணி கொள்கை ரீதியானது அல்ல, தொகுதிகள் ரீதியானது என்கிறார். ஏற்கனவே அவர் ஜெயலலிதாவோடு கூட்டணி அமைத்தவரே.


சென்ற தேர்தலிலும் அவர் தனித்து போட்டியிட்டது அவருக்கு உதவாவிட்டாலும், ஜெயலலிதாவிற்கு சாதகமாகவே முடிந்தது. காங்கிரஸ், பா.ம.க மற்றும் கம்யூனிஸ்ட்கள் இல்லாததால் தி.மு.க. வைகோ இழப்பினால் பாதிக்க பட்டது. ஆனால் இந்த முறை வைகோ வெளியேறுவது மற்ற கட்சிகளால் சமன்பட்டு செய்யபட்டு விடும். அணி மாறியதால் வைகோ பெற்றதை விட இழப்பதே அதிகம். ஒரு விதத்தில் தி.மு.க. அணியில் உள்ள சீட் பிரிக்கும் சிக்கலை வைகோ தீர்த்து வைத்துள்ளார். கண்டிப்பாக தோல்வி அடைந்தால் ஜெயலலிதாவோ, கலைஞரோ சட்டசபைக்கு வரமாட்டார்கள். அதனால் சட்டமன்றத்தில் ஒரு கலக்கு கலக்கலாம் என்று நினைக்கிறாரோ வைகோ.

என்ன காரணங்கள் அவர் மனதில் அணி மாறுவதை தூண்டினவோ?

நேற்றும் ஆதரித்தேன் , இன்றும் ஆதரிக்கிறேன், நாளையும் ஆதரிப்பேன் என்று முழங்கியவர் இன்று காட்டும் பவ்யத்தை பாருங்கள். எப்படி இருந்த நான் இப்படி ஆகி விட்டேன்.

ஜெயலலிதாவிற்கு ஒரு ராசி அவரை மிக கடுமையாக எதிர்த்தவர்கள் எல்லோரும் இறுதியில் அவரிடம் கும்பிடு போடுவது, புகழ்வது. இதற்கு ஆர்.எம்.வீ, ரஜினி, பி.எச்.பாண்டியன், வைகோ என்று பல நபர்களை உதாரணமாக சொல்லலாம்.

நாங்கள் பா.ம.கவை விட பெரிய கட்சி என்று முழங்கிய இவர்கள் இன்று பா.ம.கவிற்கு நல்ல பெயர் வாங்கி கொடுத்துள்ளனர். ராமதாசு எவ்வளவு உழைத்தாலும் இந்த நல்ல பெயர் இவருக்கு கிடைத்திருக்காது. இன்று தி.மு.க வின் மிக பெரிய எதிரி : வைகோ.