வோட்டு போடுவதை கட்டாயம் ஆக்கினால் என்ன?

சென்ற முறை ஜெயலலிதாவோடு கூட்டணி வைத்து போட்டியிட்ட கட்சிகள் அனைத்தும் இந்த முறை கலைஞரோடு இணைந்து போட்டியிட போகின்றன. 5 வருடத்தில் மக்கள் வாழ்க்கை தரத்தில் மாற்றம் ஏற்பட்டுள்ளதோ இல்லையோ, அரசியலில் தலைகீழ் மாற்றம் ஏற்பட்டுள்ளது. கலைஞர் சென்ற முறை செய்த தவறு அனைத்து முக்கிய கட்சிகளையும் கழட்டி விட்டது. அதே தவறினை கடந்த நாடாளுமன்றத்தேர்தலில் ஜெயலலிதா செய்தார். விளைவு இந்த தேர்தலில் அனைத்து கட்சிகளுக்கும் சரியான டிமாண்ட். வைகோ போனதினால் எந்த அளவிற்கு பாதிப்பு என்பது போக போக தெரியும். ஆனால் தற்போதைக்கு அது தி.மு.க விற்கு சீட் பிரிப்பதில் உள்ள சிக்கல்களை தீர்க்க உதவி செய்துள்ளது. கிட்ட தட்ட அணிகள் உறுதியாகி விட்ட நிலையில், இந்த தேர்தல் தமிழகத்தை எங்கே கொண்டு செல்லும்?
வைகோ ஆனந்த விகடனில் கொடுத்த பேட்டியில் என்ன சொல்லியுள்ளார் பாருங்கள். ஒரு இயக்கம் வளர்ச்சி காணவேண்டுமாம். அப்போது தான் கொள்கையை பரப்ப முடியுமாம். அதனால் கொள்கையை கை விட்டு வளர்ச்சி அடைவார்களாம். அதன் பின்னர் கொள்கையை பரப்புவார்களாம். வைகோ ஜெயலலிதா, கலைஞருக்கு மாற்றான தலைவர் அல்ல. அவர்களை காட்டிலும் மோசமானாவர் என்பதை இது காட்டுகிறது.
வளர்ச்சிக்காக கொள்கையை விடுவது. பின்னர் கொள்கையை பரப்புவது என்பது ஒரு போதும் நடவாத ஒன்று. தற்போது 35 சீட்கள் மட்டுமே பெற்றுள்ளனர். இந்த வளர்ச்சி மட்டும் இவர்களுக்கு போதுமா? ஒரு போதும் இல்லை. அடுத்த முறை 70 வேண்டும் என்பார்கள். அதற்கு அடுத்த ஆளுங்கட்சியாக வேண்டும் என்பார்கள். ஆளுங்கட்சி ஆன பின்னர் அதை தக்கவைப்பதிலேயே கவனம் போய் விடும். கொள்கை நிரந்தரமாக மறக்க பட்டு விடும். இதற்காக அரசியல் தலைவர்களை மட்டும் குறை சொல்லி பயனில்லை. என்னுடைய முந்தய பதிவு சுதந்திர நாட்டின் அடிமைகள் காண்க.
இந்த தேர்தல் தமிழகத்தின் மோசமான அரசியல் மாற்றங்களை கொண்டு வர போகிறதோ? இரண்டு கட்சிகளுக்கிடேயே உள்ள பகைமை உச்சகட்டத்தில் இருக்கின்ற நிலையை மற்ற சாதா குட்டி கட்சிகள் எக்ஸ்ப்ளாயிட் செய்கின்றன. இரண்டு தேர்தல்கள் அனைத்து கட்சியும் தனித்து போட்டியிட்டால் இந்த குட்டி கட்சிகள் அனைத்தும் காணாமல் போய்விடும். நடந்து முடிந்த தி.மு.க மாநாட்டில் கவனிக்க பட வேண்டிய ஒன்று ஸ்டாலின் முன்னிறுத்த பட்டாலும் அத்தைகைய வலிமை தலைவர் பதவிக்கு தேவையான வலிமை அவருக்கு உள்ளதா என்பது. தி.மு.க தெளிவாகவே கலைஞரை தான் இன்னமும் நம்பி இருக்கிறது. கலைஞருக்கு அப்புறம் உள்ள சூழ்நிலை இதை காட்டிலும் மோசமாகவே இருக்கும். வைகோ அணி மாறிவிட்ட நிலையில் இனிமேல் தி.மு.க தொண்டர்களை ஈர்ப்பாரா?
இரண்டு கட்சிகளின் சண்டையில் , மற்ற கட்சிகள் பிடி இறுகுகின்றது. ஏற்கனவே பா.ம.க. ஒரு 30 சீட் கட்சியாக வளர்ந்து விட்டது. இந்த தேர்தலோடு ம.தி.மு.கவும் அந்த இடத்தை பிடித்து விட்டது. ராமதாஸ் ஏற்கனவே வன்முறையாளராக காட்சி அளிக்கிறார். வைகோ கொள்கை என்பது வளர்ச்சிக்காக கை விட பட வேண்டிய ஒன்று என்பதில் தெளிவாகி விட்டார். தமிழகத்தின் 2011 தற்போதைய நிலைமையை விட மோசமாக இருக்கும் மக்கள் 100 சதவிகிதம் ஒட்டு போடுவதே இந்த நல்ல எதிர்காலத்தை கொண்டு வரும். வோட்டு போடுவதை கட்டாயம் ஆக்கினால் என்ன?